天下寵兒變招再拚 16/04/2025 上季喺煞科日絕地反擊成功，首次登上冠軍練馬師寶座嘅呂健威，以為今季要回氣，但依家去到馬季中後段，呂廐成績絕不失禮，計埋啱啱禮拜日沙田賽事憑「開心寶寶」同「天將龍駒」起孖，今季已經有37W，只因亞軍不及姚本輝排第4位，絕不失禮。嚟到今晚跑馬地賽事，威哥派5駒上陣，相信佢最恨贏應該係第7場四班1200米嘅「天下寵兒」。 呂健威 由前主播周嘉儀擁有嘅「天下寵兒」，上季來港初期試閘都有啲脾氣，結果上季尾在港首戰只得第8名，但今季經過首3仗嘅失利後，此駒演出漸入佳境，最近喺田草1200米連番全力出擊，可惜近3仗都係跑第2名，其中兩仗輸啲啲，非常可惜。 「天下寵兒」近3仗田草均得亞軍。 搏極都係得個近字，呂健威決定變招，唔用近6次都為「天下寵兒」效力嘅田泰安，改以冠軍騎師潘頓掛帥，戰意鮮明，除咗換人，今次亦轉爭谷草1200米兼重戴羊毛面箍上陣，擺明咩招都出晒，睇吓威哥能否連贏3日之餘，兼且幫周嘉儀首次憑自己名下嘅愛駒拉頭馬啦！