皇龍飛將輝哥追數 20/04/2025 關於早前姚本輝馬房嘅「皇龍飛將」喺2月中一場三班泥地1200米取得亞軍，但其提供嘅尿液樣本發現含有違禁物質奧美拉唑嘅研訊事件，啱啱禮拜一終於有結果，即使受薪董事小組問晒姚本輝馬房一眾員工，又睇埋馬房閉路電視錄影，再檢視治療及用藥記錄，依然搵唔到此駒賽後尿液樣本中檢測到奧美拉唑嘅原因，最終判罰姚本輝違反賽事規例第140(1)條，「皇龍飛將」嘅亞軍資格被取消，又要罰款75,000元，認真慘情。 姚本輝 畀人取消亞軍資格後，「皇龍飛將」今日列陣第8場三班1200米泥地，相信姚本輝無論係為自己抑或馬主區啟光與區希敏，都有晒決心贏馬追數。事實上呢匹4歲馬自從轉跑泥地後，表現穩定，唔計前仗被DQ，其餘4戰泥地1200米取得2冠1亞1殿，上仗跑三班姍姍來遲第2。即使今次排11檔不理想，但上仗證明留住追一段都一樣咁勁，跑法夠彈性，且看能否收復前失？ 皇龍飛將攻泥地短途愈戰愈勇。