遨遊武士1800無問題 20/04/2025 嚟緊月尾嘅冠軍賽馬日，香港一哩王「遨遊氣泡」將會出戰1600米G1冠軍一哩賽。不過，「遨遊氣泡」上陣時，日月輝煌賽馬團體一眾成員隨時可以喺今日率先贏馬壯聲勢，事關佢哋名下另一匹愛駒「遨遊武士」今日角逐第6場二班1800米草地獅子會盃，話晒挾新勝之勢而臨，當打分子連捷絕不出奇。 遨遊武士上仗輕取田草1600米。 雖然單計現時成就，「遨遊武士」同「遨遊氣泡」冇得比，但「遨遊武士」上季出道至今13戰得5冠5亞，只係得兩場冇獎金收，演出穩定得交關，上仗跑二班田草1600米更以1.6倍一面倒大熱身份掄元，賽後馬主程志輝與程俊華兩父子都話見到愛駒賠率咁熱，都有啲壓力，但亦反映愛駒嘅實力同近況，佢哋同普羅馬迷都好有信心，結果喺步速有利兼梁家俊出色嘅發揮下建功。長線嚟講，兩位程生都覺得「遨遊武士」增程跑1800、2000米都無問題，所以今次跑田草1800米都唔使擔心，睇吓能否連捷兼捧埋獅子會盃？