勝萬金3W仲未夠喉 23/04/2025 馬匹進度呢樣嘢，好多時都係估唔到，好似今季轉4歲嘅「勝萬金」，季初一度連落到五班都贏唔到，點知自從舊年10月尾打開勝門後，演出不斷進步，最近仲連盲門田草1000米直路賽都贏埋，拎到今季第3W之餘，更由五班殺上去三班，今晚出戰第8場三班1000米，究竟能否攞到今季第4W呢？ 馬主方富源 馬主之一嘅方富源講，「勝萬金」上仗終於征服田草1000米固然興奮，但佢哋本身都有啲信心，事關愛駒初出跑此程只輸畀「氣勢」跑第5名，田草性能未必太差，咁啱自己個仔返香港3個禮拜，結果可以同佢一齊拉頭馬。至於另一位馬主何國成就話前仗跑完第2名後，如果要等谷草賽程，要到今晚先有，佢哋唔想等太耐，結果提早於月中轉場出擊，結果順利建功，佢哋仲話無論上仗賽果點，今晚都有1000米畀佢跑，結果依家升上三班出擊，跑番強項問題不大。無疑今次對手強咗，但「勝萬金」由129磅變115磅，孭少14磅，繼續由鍾易禮執韁，睇吓能否為幾位馬主再拉頭馬？ 告東尼