佛亮老撾強配恨贏 23/04/2025 前香港馬王「威爾頓」今年1月初喺澳洲Living Legend牧場逝世，話晒係少數贏過打吡、香港盃同埋女皇盃嘅中長途佳駟，自然有唔少馬迷感到不捨。至於「威爾頓」馬主鄭強輝，曾經有段時間經常斥巨資引入良駒，但近年佢就將名下馬匹改為「老撾」系，自己得番一隻「浪漫老撾」服役，反而一對仔女鄭家星同埋鄭凱敏更熱心養馬，而喺今晚跑馬地賽事，「老撾」就有佢哋名下嘅「快樂老撾」、「閃亮老撾」同埋「佛亮老撾」，咁啱編喺第5、6、7場，如果可以一口氣贏晒，必定係一時佳話啦！ 潘頓 不過現實啲，呢3匹「老撾」嚟講，應該以第7場三班1200米嘅「佛亮老撾」餐士最高，呢匹今季出道嘅澳洲自購馬，頭兩場喺沙田表現平平，之後轉跑谷草3戰獲2亞，上仗嘗試跟前啲反而影響拉士，最終只得第5名，今次幕後飛起一直為此駒執韁嘅艾道拿，改用冠軍騎師潘頓，擺明恨贏，仲要抽3檔好位，有望開齋。 「佛亮老撾」谷草1200米一再追得勁。