前風再做徐廐救星 04/05/2025 上季因為馬會修例先至驚險上岸嘅徐雨石，今季即使都係要打護級賽，但形勢肯定冇上季咁惡劣，事關計埋啱啱禮拜三谷戰憑「廚神」增添進帳，徐廐目前已經有13場頭馬，只差1W就上岸，如果嗰晚好彩啲，「皇仁福星」唔係影輸飲恨嘅話，石哥已經提早畢業，對一個目前養馬量只係得27駒嘅馬房嚟講，成績真係合格有餘。 徐雨石 雖然今季應該可以順利護級，但為免夜長夢多，徐雨石都想盡快攞到今季第14W，而喺今日沙田草地賽事，徐廐有6駒上陣，當中角逐第2場五班1200米嘅「前風」挾新勝之勢而臨，有權連捷幫馬房上岸。呢匹7歲馬今季體力都算驚人，已經上陣16次，仲一度跌破20分，直到近兩仗取得1冠1亞，目前加至26分，總算逃出生天，就連石哥上仗贏馬都講笑話「前風」救番自己，仲救埋佢馬房。今次再配楊明綸跑五班田草1200米，負磅依然唔算重，睇吓能否恃勇態再下一城啦！