法國賽馬夜捧法將 07/05/2025 今晚跑馬地馬場舉行一年一度嘅法國賽馬夜，共有法國五月盃同埋法國賽馬會盃兩項錦標，通常呢啲日子，在港發展嘅法國騎師應該會分外醒神，所以今晚吼實巴度、賀銘年兩位法國好手，應該無蝕底。其中上個月23日試過喺谷戰連中三元嘅巴度，今晚只騎3駒，其中「夢照發」及「越駿知己」分別列陣兩場盃賽，但另一匹坐騎「瑤瑤日上」反而機會仲大。呢匹由容天鵬訓練嘅4歲拍賣馬，落到五班後開始有走勢，兼且搵到谷草1000米呢個最佳路程，1月尾喺呢個路程得季軍後，上月中初配巴度後上開齋，人馬合拍，今次原班人馬再臨抽1檔起步，只係孭多兩磅，連捷都非常合理。 巴度 至於賀銘年今晚坐騎比巴度多一倍騎6駒，除咗尾場新勝馬「旌鷹」，第5場「快活英雄」今季6戰未甩過獎金，可惜累積1亞3季始終未贏，今次突然轉跑谷草1650米，咁啱馬主係快活谷兄弟團體，莫非真係要等到轉跑谷草先開齋？ 「瑤瑤日上」上仗配巴度開齋。