艾兆禮強勢飛向100W 10/05/2025 一向喺歐洲發展唔錯嘅意大利好手艾兆禮，上季毅然決定長駐香港，結果首季已有48場頭馬，畀馬迷、練馬師同埋馬主都留低唔錯印象。嚟到第2季，呢位可以造輕磅嘅騎師成績更進一步，暫時已經有47W，仲有兩個月先煞科，相信要突破上季成績唔係咁難。另外原來艾兆禮在港已累積98場頭馬，只差2W就達100大關，而佢今日有9匹坐騎，實力唔差，隨時有機會達標。好似第2場四班1000米草地嘅「鼓浪高升」，上仗首次由艾兆禮執韁幾乎贏馬，最終只係輸短頭位畀「勝萬金」得季軍，賽後運上從化密密操，擺明車馬求補中。 艾兆禮 至於第9場三班1200米草地嘅「魅影戈飛」，今季出道3戰得1冠1亞1殿，剛戰同樣都係首次由艾兆禮接手，就算抽最外嘅12檔，依然可以迅速切入擺前走，最終大炒對手兩個幾馬位，姿態出色。雖然賽後被重手加10分，今次要升上三班，但對此匹3歲姚廐馬嚟講，孭少9磅更有優勢，況且今次檔位比上仗好，話唔定可以為佢帶嚟在港第100場勝仗。 姚本輝