超加加力爭3連捷 10/05/2025 雖然呢輪姚本輝手風麻麻，連續4次賽事無進帳，但啱啱周三派3駒上陣全部有獎金收，令姚廐季內累積獎金已達$107,993,623，比佢上季仲要多，亦係佢從練至今累積獎金最高嘅一季。嚟到今日沙田賽事，輝哥派7駒上陣，其中第7場三班1650米泥地有「皇龍飛將」及「超加加」雙龍出海，均有泥地根據，「超加加」新勝同程兼繼續以潘頓掛帥，兼且係馬房首選，應該係主力所在。 馬主史佩加 講起「超加加」，梗係要提吓女馬主史佩加（Kathleen），呢位「先生」系馬主史立德嘅千金都做咗馬主一段時間，之前養過嘅「好加加」、「靚加加」都可以交出頭馬。 而今次呢隻「超加加」初出已經喺泥地1200米入圍，最近更於泥地一哩打疊贏兩場，Kathleen講雖然上場愛駒抽不利10檔，但有冠軍騎師潘頓嘅垂青，兼且一直喺泥地跑得好，所以都有信心，結果順利再下一城。另外，即使唔排除日後會讓「超加加」跑番草地，但既然愛駒泥地能力咁好，再跑泥地合情合理，亦相信愛駒升上三班面對挑戰下可以繼續進步，今次仲要孭少14磅兼續配潘頓，有望3連捷。