最紅女馬主繼續威 14/05/2025 要數今年當旺嘅女馬主，車曉紅（Ada）肯定係其中一位，事關Ada同兩位老友唐獻芳、許禮詩養嘅「祝願」，今季贏咗4W兼攻下香港經典一哩賽，然後喺香港經典盃同香港打吡大賽都跑第2名，最近挑戰G1冠軍一哩賽亦得殿軍，演出並唔失禮，依家累積獎金已突破2,000萬，絕不簡單。 「翠紅」馬主車曉紅及唐獻芳（左二、左三）。 不過，始終今季4歲拚搏唔少，廖康銘已經畀「祝願」提早抖暑，但車小姐又唔使擔心今季再無拉頭馬機會，事關佢有份嘅紅粉精英團體馬「翠紅」今晚角逐尾場三班1200米，有權再下一城。 今季出道嘅3歲澳洲PPG「翠紅」，在港首戰已經入Q，點知之後跑3仗都三甲不入，剛戰轉場初跑谷草1200米兼初戴眼罩上陣，卻後上一攻而破打開勝門，同場跑亞、季軍嘅「安康萬里」、「飲杯」上周再出串Q，證明賽事水準高。聽車曉紅講，愛駒一早試過贏谷草閘，所以上次轉跑谷草都覺得有作為，同埋前仗擺前走效果唔係咁好，拉士200米力弱後，上仗索性轉跑法，結果威力更大，而佢亦相信馬兒可以繼續進步，今次再度出爭谷草1200米，磅位唔算太重，連捷機會樂觀。