上季幫鄭廐畢業 新力再來一次 14/05/2025 啱啱禮拜六沙田好似係啲下游練馬師畢業禮咁，先有容天鵬食頭胡贏夠16場上岸，然後輪到丁冠豪憑「閃光燈」及「小鳥天堂」起孖，順利攞到14W，唔使連續兩季都要收警告信。依家得番鄭俊偉一個斯人獨憔悴，事關目前得番佢仲未達標。不過，大家又唔使擔心米高哥嘅，皆因佢喺上周六憑「愛馬善」食尾胡，馬房目前都有13W，只差1場畢業，距離馬季結束仲有兩個月，應該唔難啩！ 鄭俊偉 當然，為免夜長夢想，對鄭俊偉嚟講，梗係盡快贏多場最實際，而喺今晚跑馬地賽事，鄭廐有3駒出擊，「喜悅一生」喺五班演出穩定，「木火兄弟」就係谷草專家，都係有機會為馬房出分力。但而如果鄭俊偉最後係憑「新力」上岸，就真係非常巧合喇。 「新力」上年5月為鄭廐贏得第14W。 抽3檔形勢極有利 點解咁講，原來「新力」上季正正係鄭廐第14W，即係畢業頭馬，而呢匹4歲PPG上季尾連贏兩場後，今季進度的確有啲唔符合預期，但表現穩定，9戰只得一次冇獎金，剛戰改用賀銘年抽不利嘅10檔跑谷草1200米都得季軍，今次原班人馬再臨排3檔好位，睇吓能否補中兼再次成為鄭廐畢業馬？