錶之極光潘頓搏硬 18/05/2025 伍鵬志經歷一輪小低潮後，啱啱禮拜三谷戰終於憑「包裝創新」打破悶局。其實上季Pierre為爭冠軍去到咁盡，今季初依然頻頻數胡，嚟到呢個階段先回一回氣，都好合理。不過，既然贏番馬，相信伍廐陸續有嚟，今日派7駒上陣搏殺，角逐第6場四班1200米草地嘅「錶之極光」強配潘頓出擊，當然要吼實。 潘頓 其實潘頓最近同「錶」系都加強合作，雖然「錶之銀河」近兩仗由呢位冠軍騎師接手都係贏唔到，剛戰冠軍一哩賽只跑第5名，但另一匹「錶」系賽駒「錶之星河」卻喺佢胯下兩戰全勝，上周六更以1.3倍大熱門再下一城。 「錶之極光」埋門由潘頓勝出泥閘。 至於今次呢匹「錶之極光」，今季在港出道頭3仗表現平平，但其後兩度於三班田草1000米入圍，證明有能力，其後再跑兩仗表現一般，依家減夠分落到四班，立即由潘頓接手，而呢位冠軍騎師亦好有誠意，早前刻意為此駒試咗課泥閘，兼且率先衝線，馬匹走勢吸引，睇嚟今次都係擺明車馬，睇吓潘頓能否繼「錶之星河」後，再次為「錶」系賽駒建功？