遨遊波士擺明打快攻 25/05/2025 今日沙田馬場焦點，梗係姚廐鎮倉寶「遨遊氣泡」能否繼「翠河」後成為香港史上第2匹三冠馬王。不過，對「遨遊氣泡」馬主日月輝煌賽馬團體骨幹成員程志輝、程俊華嚟講，佢哋有機會喺「遨遊氣泡」出爭遮打盃前，已經率先拉頭馬，事關佢兩父子同老友藤澤忠義、張耘夾份嘅「遨遊波士」，今日首度登場角逐第3場四班1200米，有權一鳴驚人。 「遨遊波士」大閘愈試愈好，初出夠火候。 其實「遨遊波士」好似約定與「遨遊氣泡」同日出擊，事關前駒練馬師羅富全早前試過用王牌幫呢匹3歲PPG報名，可惜卻做後備，最終等到今日用保護權上陣。而近年程生嘅「遨遊」系賽駒通常在港首戰跑得好，「遨遊氣泡」初出入Q，而「遨遊武士」同埋「遨遊戰士」就首戰即贏，「遨遊天下」在港初出亦得季軍。今次「遨遊波士」來港後試5課大閘，擺明操好先出，今次用「遨遊」系愛將之一嘅梁家俊抽1檔，有望率先贏馬為「遨遊氣泡」壯聲威。 羅富全