鍾易禮奔放爭升格 25/05/2025 今個月告東尼成績都算唔錯，夾夾埋埋都贏咗5W，嚟到今日沙田賽事，呢位從練曾捧走7次遮打盃嘅傳奇倉主，今次則三路興兵，但牌面唔算太強，要第8度贏呢場2400米G1都唔係容易。反而喺第10場三班2000米，東廐有兩匹新勝馬「快路」同埋「奔放」雙龍出海，相信可以再添頭馬。當中由蕭氏家族成員蕭劍瑩擁有嘅「奔放」，雖然係馬房次選，但上仗正正喺田草2000米開齋，路程比「快路」更有根據，未必係副車。況且聽蕭劍瑩哥哥蕭劍平講，即使「奔放」於英國只係贏一哩賽事，但當初購入呢隻馬都係為咗跑中長途，結果上仗初跑2000米立即建功，佢亦大讚鞍上人鍾易禮發揮出色。今次再跑田草2000米，雖然抽不利嘅13檔，但前置馬應該問題不大，加埋鍾易禮在港已累積94W，睇吓能否憑「奔放」拎埋第95W升格減2磅啦？ 「奔放」（左）上仗力壓「金主」取勝。