超霸勝蔡明紹追落後 28/05/2025 蔡明紹啱啱禮拜日新馬賽憑「光年程祥」爆冷食頭胡，反而喺澳洲客串返港嘅潘明輝就冇進帳，令紹仔目前落後火車潘5場頭馬，爭奪「告東尼獎」仍有機會。無疑已經到咗季尾階段，但潘明輝今晚要停賽，下個月又要停賽兩期，即使紹仔下個月中都要停1日，但只要保持呢個氣勢，都唔係冇得追，如果今晚可以趁火車潘停賽再追近啲，「告東尼獎」今季鹿死誰手都未必咁快有結果。睇番今晚蔡約翰騎6駒上陣，「平海之星」上仗初跑谷草1800米得殿軍，今次改用蔡明紹增程跑2200米或者更啱腳法。 蔡明紹 不過計埋牌面，應該係第9場三班1200米嘅「超霸勝」最好機會，呢匹6歲澳洲自購馬今季演出算穩定，最近落到四班優勢更加明顯，前仗強配布文跑此程抽12檔姍姍來遲後，剛戰抽1檔順利補中。雖然今次重返三班，布文亦因為造唔到磅改用蔡明紹接手，而紹仔季初騎過3次曾入Q，人馬早已有默契，今次難得再抽1檔仲要比上仗孭少15磅，連捷亦唔會太意外。