伍鵬志笑住攀獅子山 31/05/2025 上季鬥到去煞科日先冇咗冠軍練馬師寶座嘅伍鵬志，今季初段仲可以維持強勢，但始終搏足季幾兩季，去到上個月初開始馬房終於陷入低潮，足足個半月無進帳。不過，最近Pierre慢慢畀到啲驚喜大家，月中先有「包裝創新」爆出20倍冷W，啱啱禮拜三晚輪到20倍嘅「比特星」贏馬開齋，反映伍廐經過一段時間調整，開始止跌回升。 伍鵬志 今日田戰，Pierre一口氣派10駒上陣，而喺第6場三級賽1600米草地獅子山錦標更有「玩笑」及「嘉應傳承」雙龍出海，練者上季憑「錶之銀河」奪標，今季肯定都想衞冕啦。 艾兆禮 呢兩匹伍廐馬，「玩笑」牌面肯定好啲，始終「嘉應傳承」係流鼻血後抖咗近半年復出，1600米亦嫌稍短，反而「玩笑」跑完打吡後抖咗兩個幾月回師贏過嘅田草1600米，路程亦合腳法。況且睇番啲資料，對上4屆獅子山錦標，其中3次由4歲馬建功，而「玩笑」正正係4歲馬，只負115磅輕飄飄，再睇吓啱啱遮打盃有兩匹4歲馬「球星」及「百賀飛駒」入圍，證明今年啲4歲馬水準唔差，睇吓再配艾兆禮的「玩笑」今次能否攻下G3？ 「玩笑」（左）大前仗田草一哩擊敗「勁速威龍」。