黎昭昇高唱英雄戰歌 31/05/2025 經過季初一輪低潮，新西蘭冠軍練馬師黎昭昇呢輪成績總算慢慢反彈，上個月有4W，今個月未計仲有今日沙田賽事，已有4場頭馬。不過始終馬房都搏咗一輪，今日黎廐只係出馬兩匹，但都唔係冇添食機會，事關第3場四班1200米草地嘅「英雄戰歌」，正正挾新勝之勢而臨，有望再下一城。 4歲PPG「英雄戰歌」今季抖到2月中先復出，聽馬主幸運馬主團體成員梁啟徽講，愛駒上季尾已經試過右膝受傷，然後去到今季初就兩膝接受關節鏡手術移除碎骨，慶幸黎昭昇畀咗好多心機，等到愛駒健康回復正常先安排上陣，結果季內頭兩場都順利入Q，剛戰更於四班田草1200米順利補中開齋，梁生都話見到愛駒克服傷患贏馬好開心。另外，梁生都提到上次原本擔心場地偏快，對「英雄戰歌」呢啲曾有腳患嘅馬有影響，點知出閘前突然落雨，或者有幫助，而最近天氣唔穩定，今日隨時都會落雨，睇吓「英雄戰歌」能否把握機會贏多場？