川河首駒再稱黃 04/06/2025 季尾階段人馬俱疲，有磅減嘅見習生通常喺呢段時間都得到重用，成績亦比較好。不過，由於今季初出道嘅女將黃寶妮，目前仲未可以喺跑馬地上陣，故此如果想喺谷戰搵小將減磅搏殺，得番黃智弘一個可以用。難怪今晚谷戰，黃智弘得到唔少支持，除咗喺第7場三班1800米坐冷板，共騎8駒上陣，當中師傅方嘉柏就將「川河首駒」、「信心星」同埋「鈦易搵」交晒畀徒弟，睇吓弘仔能否繼上周三谷戰起孖，今晚又再大殺四方。 方嘉柏 第4場四班1650米，「川河首駒」季初曾經喺黃智弘胯下正正贏四班同程，該仗更克服不利嘅12檔，以頸位之微力壓今晚已經雙雙跑三班賽事嘅「香港神駒」及「智勇名駒」，反映賽事水準唔差，其後升上三班則表現一般，最近落到四班部署卻忽長忽短，先後跑過谷草2200、1800、1650米同埋田草1400米，目前評分比起季初贏馬時低咗8分，今次重配黃智弘減7磅回師谷草1650米，只負121磅真係着數到暈，埋門工夫如常，狀態保持勇銳，睇吓呢位仲差4W就要升格減5磅嘅小將，能否再次為「川河首駒」建功啦！ 黃智弘