蔡明紹有顆奮鬥心 04/06/2025 最初以為今季嘅「告東尼獎」，潘明輝應該都十拿九穩，事實上呢位本地薑由季初至依家嘅演出都好穩定，的確值得拎呢個獎。不過，最近另一位Matthew蔡明紹手風亦非常順，近4次賽事均有進帳，頭馬有冷有熱之餘，上周六更憑「和平波」贏出今季個人首場G3，現時只係落後火車潘4W，都唔係冇得追㗎。 蔡明紹 而喺今晚跑馬地賽事，蔡明紹就有6匹坐騎，唔係冇機會延續勝勢，連贏5日，當中角逐第8場三班1650米嘅「奮鬥心」有望幫佢完成目標。呢匹巴西自購馬今季初喺三班不論跑田草、谷草抑或泥地都有獎金收，反映實力唔算太差，之後似乎部署減分沉咗一輪，剛戰落到四班跑谷草1650米有心出擊，可惜不敵「極速滿貫」獲亞。「奮鬥心」賽後無加分仍評60分，其實可以繼續揀跑四班賽事，但伍鵬志卻讓馬兒重返三班，兼改用蔡明紹，孭少17磅固然對此匹細馬有幫助，有望順利打開勝門，兼幫蔡明紹進一步迫近火車潘。 奮鬥心周一朝彈草閘走勢勁。