舞林寶典精神可嘉 08/06/2025 天王郭富城一向熱愛賽馬運動，經常入場為愛駒打氣，今日季內首次黃昏賽期，雖然頭場開跑時間變咗下午4點，相信Aaron依然會嚟沙田馬場，事關佢一對愛駒「舞林密碼」及「舞林寶典」分途出擊，呢兩隻馬上仗非冠即亞，今次梗係有機會再交好成績。 舞林寶典初出直路賽即勝。 先講吓剛戰一出即勝嘅「舞林寶典」，最初郭富城幫呢匹愛駒改名做「著迷」，之後先改叫「舞林寶典」呢個名，佢就話因為希望大家見到「舞林」就諗起佢自己，所以盡量用呢兩個字幫愛駒命名，而佢亦對「舞林寶典」上仗初出即勝非常感動，因為愛駒來港後操練受傷，傷完左腳再傷右腳，兼且唔太適應水土，用咗一段時間養番好隻馬，到咗今年初就想安排愛駒上陣，點知試完閘又傷咗要抖幾個月，足足等咗一段長時間先出賽，都可以順利贏馬，證明有能力。 另外，郭富城仲話「舞林寶典」同自己嘅精神都相似，因為佢自己跳舞時都會受傷，好番都會再上舞台表演，而「舞林寶典」都係曾經受傷，但好番後一樣可以贏馬。既然依家康復晒，「舞林寶典」今日再跑四班田草1000米直路賽，有望再下一城。