漣心星力撐賀銘年 08/06/2025 如無意外法國好手賀銘年跑埋今季就會離開香港返回祖家發展，相信佢都想喺季尾階段盡力爭取好成績，為馬迷留下好印象。今日季內首次黃昏賽事，賀銘年停賽刑滿復出，雖然只得5匹坐騎，但「自力更生」同埋「漣心星」都係有近績支持之輩，後駒更有機會為佢帶來進帳。 漣心星跑五班賽始終有優勢。 嚟到季尾，賀銘年上陣次數加起來都唔夠220場，只得7場頭馬，的確唔係太好，話晒嚟咗香港發展幾年，每季頭馬都有雙位數，希望今季唔會衰收尾。 賀銘年 而今次呢匹「漣心星」，賀銘年其實同幕後早已有默契，事關今季曾為同系嘅「深心星」建功，今次首度接手「漣心星」並不奇怪。方嘉柏最近安排此駒轉戰谷草，前仗跑谷草一哩嫌長表現平平，上仗谷草1200米就追唔切，今次轉場跑田草1400米，都算係中間落墨，質新馬落到五班始終有啲優勢，即使檔位唔算太理想，但以方嘉柏近期嘅氣勢，有望造就呢位弱勢騎師贏多場。