雪茄福星有備而來 11/06/2025 希斯目前取得54W，落後榜首嘅蔡約翰8W，雖然有啲難度，但唔係絕對無得追，希斯今期谷賽都精銳盡出，派8駒上陣，當中第2場四班1000米初出嘅3歲澳洲自購新馬「雪茄福星」，有備而來值得留意。 希斯 「雪茄福星」一直由潘頓親自操練，更曾親自策騎此駒試過3課大閘，極度重視，且試閘走勢不俗，有唔錯前速之餘亦能夠貫注到尾，今仗初出即使排12檔相信亦可克服。而潘頓亦替希廐「太陽勇士」效力，季內3勝7位表現穩定，潘頓騎3次1冠2亞，仲要排埋過往兩戰得冠亞各一嘅1檔，贏面相當之高。 「雪茄福星」（左）試谷閘得第2走勢熟練。