桃花多潘頓溫舊夢 14/06/2025 潘頓同「桃花」系馬主曾祥顯關係唔錯，上季為曾生有份而身價逾千萬嘅桃花團體賽駒「桃花開」孭135磅贏咗場三班田草1800米後，一心打算喺今季嘅4歲馬經典系列賽大放異彩，潘頓亦一度寄予厚望，可惜呢隻馬今季進度唔算太理想，去年12月初跑完一場谷草1800米就驗出右前腿不良於行，其後表現未能交出水準，喺香港經典盃同埋香港打吡大賽都係三甲不入，結果賽後抖咗3個月都未復出。 潘頓 雖然「桃花開」未知幾時上陣，但潘頓今日就有機會為曾祥顯建功，事關佢為曾生自己嘅「桃花多」效力，亦係今季首次騎呢匹6歲拍賣馬。當然，潘頓對「桃花多」唔算太陌生，事關上季嘅煞科日，佢正正夥拍此駒贏咗場五班田草1400米，以頸位之微氣走「香飄萬里」，今次故劍重逢跑五班田草1600米，評分仲要比上季尾贏馬時低3分，梗係有啲優勢。況且「桃花多」上仗谷草1650米已追近，今次復課有拍跳非常積極，由潘頓接手，有望趁季尾贏番場。 桃花多（近鏡）上季煞科日配潘頓贏馬。