韋達當旺 頭馬蜜蜜送 14/06/2025 韋達開倉至今成績穩定，前季稍差都有36W，其餘4季都至少有40W或以上。不過，呢位騎而優則練嘅香港馬圈標誌性人物，今季整體表現就差咗啲，暫時只得25W，主因係佢田草成績太差，只得4W。不過，近期韋廐馬漸漸回勇，主場跑馬地固然得心應手，剛周日田戰亦靠「不可擋」建功，馬房連贏3日，如果可以保持氣勢，今季頭馬數字有機會衝上3字頭。 蜜蜜送谷草練好氣，今次轉場有計。 睇番今日沙田賽事，韋達只派3駒上陣，但重質不重量，「凱旋七福」喺五班有優勢，而「龍城強將」今季正正贏過四班1400米，至於「蜜蜜送」強配潘頓出擊，擺明想連贏4日。即使韋達同潘頓合作次數唔算多，但只要韋達肯用呢位冠軍騎師，尤其1800米或以上嘅賽事，成績就特別好，近5次潘頓騎韋廐馬跑1800米以上嘅成績係2冠2季，表現出色。 「蜜蜜送」在港第3次上陣已喺谷草1650米入Q，證明有一定能力，上仗扳上谷草2200米可能增程太急，今次改跑田草1800米兼初戴羊毛面箍上陣，埋門試泥閘亦有前有後，做足工夫而臨，睇吓潘頓能否成功幫韋達連贏4日？