久久為軍升班夠殺 22/06/2025 自從上演黃昏賽後，告東尼連續兩期沙田賽事都有進帳，加埋贏咗3W，今日東廐派9駒參戰大搏殺，除咗喺第8場1800米G3精英碟三路興兵，第11場三班1400米嘅「久久為軍」都係挾新勝之勢而臨，有機會幫Tony哥延續黃昏賽旺勢。 「久久為軍」（近鏡）上仗降落四班即開齋。 3歲澳洲自購馬「久久為軍」頭3次上陣跑1000、1200米短途明顯嫌短，但都有啲追勢，估唔到上仗落到四班除頭罩增程跑1400米，立即贏馬開齋，表現大幅進步。聽馬主何駿杰講，原來「久久為軍」係佢自己買返嚟，因為佢睇過愛駒喺澳洲出賽片段，覺得有能力同埋適合香港賽事先引入。另外，何生話「久久為軍」前仗跑谷草1200米都有走勢，但跑完嗰場就覺得跑馬地急彎唔太適合愛駒發揮，剛戰回師沙田兼增程，結果證明長直路較啱呢隻馬，難怪今回升班都繼續喺田草攻堅。即使何生覺得愛駒日後跑1800甚至2000米都無問題，但今次再跑1400米都唔使太擔心，況且孭少10磅，升班亦不能忽視。 馬主何駿杰