力爭5連勝 蘇偉賢如有神助 25/06/2025 蘇偉賢自從喺16至17年度馬季攞到56W後，最近7季都係廿幾卅場頭馬徘徊，而喺啱啱禮拜日Chris哥憑「駿馬之曲」及「皇金風速」起孖，季內頭馬增加至36場，亦係近8季最高，加埋馬房已經連贏4日，手風大順，馬季餘下7次賽事，相信佢都好想今季頭馬數字突破4字頭。 蘇偉賢 嚟到今晚跑馬地賽事，蘇偉賢只派3駒上陣，「宏才」同埋「南莊堡」都近況平平，搶分重任自然落喺角逐第3場四班1200米嘅「雷神太保」身上。呢匹今季出道嘅4歲澳洲自購馬，在港第2次出賽已喺三班田草1200米得第5名，走勢唔差，可惜之後演出較為反覆，直到近期落到四班兼轉跑谷草短途，表現進步。剛戰角逐四班谷草1200米，後上只不敵孭少16磅嘅「比特星」，亦無話可說。今次「雷神太保」繼續用布文跑同程，難得遇上一組唔算強嘅四班對手，睇下Chris能否幫「雷神太保」贏馬交代之餘，更助馬房連贏5日。 「雷神太保」（左）上仗只負於「比特星」得亞軍。