潘頓容天鵬共創雙贏 28/06/2025 最近手風都算順嘅冠軍騎師潘頓，以為啱啱禮拜三會斷纜，結果都畀佢憑文家良訓練嘅「騰龍四海」食尾胡，兼且幫此駒拎到季內第5W，自己亦連贏3日。到咗今日黃昏賽，潘頓接手「騰龍四海」馬主之一莊文煜醫生有份嘅「雙贏」上陣，角逐第5場四班2000米草地，睇嚟佢都有機會連續兩期幫莊醫生贏馬。 潘頓 其實潘頓與莊醫生嘅愛駒都算幾夾，「騰龍四海」最近喺騎者胯下連贏兩場，之前養過嘅「傲龍駒」亦喺呢位冠軍騎師手上取得3W。 容天鵬 至於今次主角「雙贏」，上季服役至今跑咗14場，雖然都有3個亞軍，但仍未開齋，前仗跑田草1800米後上不及輸條頸，上仗被捧成3.5倍熱門，可惜出閘慢咗，入直路攞位欠順，結果姍姍來遲只得殿軍，今次改由潘頓接手，亦係佢首次策騎此駒，而練馬師容天鵬退休在即，肯定毫無保留，擺明想補中。單計近期表現，「雙贏」今次增程跑2000米毫無問題，亦刻意改戴開縫眼罩上陣，配合1檔好位，機會樂觀。 「雙贏」前仗田草1800米獲亞軍已試準。