開心五月靠告仔衝特別獎 01/07/2025 告東尼處理新加盟賽駒一向特別急進，上周六沙田黃昏賽，佢接手今季贏過直路賽G3嘅「美麗第一」唔夠1個月，估唔到轉倉首戰立即贏一班田草1000米，真係省到招牌立立令，盡顯功力。嚟到今日沙田賽事，東廐強陣派9駒出擊，第10場三班1600米嘅「開心五月」又係轉倉初出，究竟會唔會好似「美麗第一」咁，加盟東廐首仗立即建功呢？ 「開心五月」埋門試泥閘一放到底。 其實今次「開心五月」轉投東廐，都算係歸隊性質，事關馬主陳璟瓏之前嘅「不可思議」及「風雨駒」都係由告東尼訓練，就連佢囝囝陳俊文嘅「開心三多」及團體馬「開心勇駒」同樣擺喺東廐。至於「開心五月」最初交畀今季開倉嘅游達榮訓練，去到今年4月初終於喺四班田草1600米打開勝門，可惜之後升上三班兩戰輸晒，名次仲要係雙位數，難怪陳璟瓏想轉倉求突破，畢竟愛駒仲係4歲，如果可以趁季尾贏到場三班賽事，就會拎到150萬自購曾出賽馬匹特別獎金，難怪加盟唔夠1個月，已經做足工夫，今次孭輕磅有權交出好成績。