友瑩亮唔怕邪再贏 05/07/2025 伍鵬志（Pierre）上季爭冠鬥到煞科日，兼且一度仲有3場領先優勢，點知最後都係輸畀食出大四喜嘅呂健威，失落冠軍練馬師寶座。始終頭兩季開倉加埋贏咗110W，嚟到第3季真係要回氣喇，但整體表現唔算太差，暫時有39W，相信要突破4字頭應該唔難，嚟到今次沙田黃昏賽，佢派出一出即勝嘅「友瑩亮」再爭四班1200米草地，有權連捷為伍廐贏出今季第40W。 楊毅夫婦 聽「友瑩亮」馬主楊毅講，佢當初知道愛駒烙號又係400時，佢心諗有冇咁邪，事關佢太太胡珮君之前有隻「友瑩樂章」烙號係B400，點知未跑過就已退役，依家「友瑩亮」就係K400，好彩後駒可以一出即勝，而「友瑩亮」係佢送畀太太嘅馬，咁啱上次初出就係父親節前夕，佢同太太都帶晒自己父母入場拉頭馬，非常開心。前景方面，楊毅覺得上仗都睇到「友瑩亮」有前速有鬥心，前景應該唔差，日後應該跑1600米都無問題，但依家3歲跑1200米都合理，繼續由黃智弘減磅，值得重視。 「友瑩亮」剛戰初出即贏出田草1200米。