「美麗」雙雄再孖住上 09/07/2025 近期郭少明嘅「美麗」系都算旺氣迫人，「美麗第一」轉倉初出即贏一班賽事，「美麗同享」就攻下G3精英碟，啱啱上周六就更誇張，苦戰33個回合仍未出頭嘅「同樣美麗」，竟然可以殺低一面倒大熱門「錶之星河」，順利打開勝門，真係估佢唔到。 「一起美麗」 不過，呢輪「美麗」系似乎只係識贏沙田，反而跑馬地就弱啲，但嚟到今晚谷戰，佢哋有蔡約翰馬房嘅「一起美麗」及「無限美麗」分途出擊，咁啱分別跑第8場及第9場，呢口「美麗」加蔡神仙嘅孖寶，絕對博得過。 「無限美麗」 先講吓「一起美麗」，3月尾喺香港打吡大賽無功而還後，隔咗1個月跑三班谷草1800米只得殿軍，然後蔡約翰畀呢匹4歲馬抖多兩個月復出跑嫌短嘅田草1400米，結果後上得季軍，今次立即回師強項谷草1800米，目標明確。至於尾場三班谷草1200米嘅「無限美麗」，今季首次起用潘頓，過往人馬合作6次只得一次甩三甲，證明合拍。另外，其實「無限美麗」及「一起美麗」喺今年3月12日嘅谷戰試過雙雙建功，今晚可望重溫好夢。