小鳥天堂再度起飛 13/07/2025 社交平台喺依家嘅重要性，應該唔使點提，好多人都花唔少時間利用社交平台睇嘢，出post或者同其他人交流。至於賽馬雖然畀人老土嘅感覺，但依家都有唔少馬主利用社交平台同啲馬迷交流，同埋分享吓愛駒近況，好似前主播周嘉儀就為愛駒「天下寵兒」整咗個IG戶口，最近分享咗愛駒喺從化嘅放草片段，而今日沙田賽事角逐第4場四班1400米嘅「觀眾之力」馬主黃婉曼，都有喺自己社交平台上載愛駒片段。 「小鳥天堂」在港3戰得2冠星味十足。 至於今季出道3戰兩勝嘅新星「小鳥天堂」，幕後除咗幫愛駒開咗IG戶口，甚至連比較新嘅社交平台Threads都有戶口，最特別係入面內容，好似用咗擬人法咁，用「小鳥天堂」嘅第一身角度分享近況，好似上仗初逢敗績後，喺佢嘅社交平台就講番唔知係咪初次跑黃昏賽，結果隻馬出閘彈起失位，兼且遇到慢步速追唔返。 至於丁冠豪今次再安排馬匹跑贏馬路程田草1200米，睇番呢個社交平台最新出嘅post，就話明「小鳥天堂」今次準備充足，無論出閘、快跑、慢試都做得好，打算喺沙田煞科戰交出好成績，睇吓係咪可以再次起飛啦！