美麗同享繼續服役 13/07/2025 家有一老，如有一寶。就算賽馬世界，千祈唔好睇小啲年紀大嘅賽駒，好似啱啱禮拜三跑馬地夜賽，希廐已屆8歲嘅「赤馬雄風」拎到谷草1650米第10場頭馬，認真犀利。至於今日出戰重頭戲第8場一班1600米香港馬主協會錦標嘅「美麗同享」，同樣都係8歲，但剛戰都仲依然可以擊敗應屆打吡冠軍「百賀飛駒」，攻下1800米G3精英碟，寶刀未老，甚至令「美麗」系嘅話事人郭少明都話會延長呢隻馬嘅服役生涯。 告東尼 聽郭生講，「美麗同享」年紀都唔細，原本打算跑完上場三級賽同埋今日呢場一班1600米後，就會畀愛駒退役，點知上仗贏到精英碟後，練馬師告東尼覺得呢隻馬仲有兩腳，唔好咁快退役，所以決定跑多季，下季轉9歲繼續上陣。另外，郭生亦提到告東尼話「美麗同享」近況好弗，上仗原本都有信心，點知嗰日場地一直利前領，以為不利愛駒，點知最後都克服難度後上建功，今次縮回跑1600米，路程唔使擔心，只係孭135磅的確有難度，但會盡力爭取佳績。 「美麗同享」上仗後上勝出精英碟。