將轉任柏廐高級策騎員　陳嘉熙目標從練 16/07/2025 本地小將陳嘉熙近季欠缺支持，而他在年初已決意跑畢今季賽事後將會掛靴，轉向幕後發展。相隔近4個月後，騎者今晚谷草夜賽復出之餘，亦迎來其從騎生涯最後1日賽事，而方嘉柏和巫偉傑亦有提供「鈁糖武士」及「魔術控制」。 陳嘉熙 雖然曾謠傳陳嘉熙下季將會加盟桂福特馬房擔任策騎員，但此消息騎者已否認，但他當時亦未有抹煞任何可能性，且看馬會的安排。而方嘉柏昨日承認已申請陳嘉熙擔任麾下高級策騎員。 方嘉柏今晚提供「鈁糖武士」予陳嘉熙跑第9場三班1200米，擺明有心關照，且看騎者能否在谷草煞科夜贏番場頭馬光榮掛靴。 而陳嘉熙昨日接受訪問時表示，特別感激方嘉柏以及巫偉傑支持，現時抱平常心準備今晚賽事。騎者昨晨為「魔術控制」及「鈁糖武士」作最後熱身，當然希望可夥拍兩駒取得佳績。而佢亦提到，「鈁糖武士」對佢嚟講好特別，因為兩季前曾經歷低潮好耐冇頭馬進帳，而且嫲嫲離世，當時非常傷心，但「鈁糖武士」為佢帶來頭馬，之後亦可繼續夥拍此駒取得好成績，所以喺掛靴前可以再騎佢上陣都係有特別意義。騎者亦提到，煞科後將會重新出發轉任幕後，長遠目標向副練馬師及練馬師之路努力。 另外，季後將離港嘅湯普新，將會喺星期四啟程回澳，騎者表示，8月初昆士蘭馬季開鑼就會上陣。