方嘉柏再度現身晨課 31/07/2025 沙田馬場晨課已重開一個星期，依舊只得柏、游、葉及丁廐有派馬出彭福公園策騎徑操練，場面冷清，相信隨着今日機坪踱步圈重開，會有更多馬房開操。 方嘉柏 冇見兩日的倉主方嘉柏昨晨再次現身，並且校啱6點15分到場，吼實旗下4駒出試，分別係「幸運傳承」、「朗日雪峰」、「堅多福」及「觀眾之力」，課後小方偕同兒子Ronan穿越幾條欄，山長水遠闖入彭福公園策騎徑閘口逐駒恭迎，相信好大機會係新季先頭部隊。 昨晨7時10分，葉廐「神煞金剛」由助手於彭福公園策騎徑完成踱步操練後，於閘口擰頭擰髻，跟手仲耍雜技，表演90度角起擒，好在鞍上人身手敏捷，冷靜地取得平衡繼而控制馬匹。 伍鵬志今日派馬操練 伍鵬志在港設廐3季，喺2023/24年度馬季一度幾乎成為冠軍練馬師，可惜最後喺沙田煞科戰被呂健威反超，無緣封王。伍廐上季初亦一度喺練馬師榜上領先，惟踏入2025年後成績下滑，最終只以40W結束賽季，係練者開倉以來最差嘅成績。伍鵬志當然想新季反彈，爭取重返爭冠行列，所以練者已經重返崗位，昨晨先喺馬房打點，佢透露今日機坪重開後會派馬操練。