希威森復課 新季目標50W 21/08/2025 距離新馬季開鑼仲有兩個幾禮拜，愈來愈多騎師回防，昨晨就有希威森同埋蔡明紹齊齊開工，其中希威森自從6月25日策騎「四季醒」意外落樓，導致右手手腕出現骨裂，同時右腳踝亦疑有骨裂，因此提早抖暑休息。昨晨希威森操兩匹廖廐馬「駟跑得」及「康昌之星」，右手仍貼上膠布，據佢所講，右腳已經完全康復，右手手腕就好番九成左右，佢相信之後透過試閘同埋晨課操起狀態，可以趕及喺開鑼日復出上陣。 「駟跑得」昨由希威森單試，人馬皆爽。 對於上季只得29場頭馬，希威森坦言不算太滿意，但他認為上季面對不少困境，尤其每當開始贏馬手風轉順時，往往因停賽缺陣，被打窒贏馬勢頭，然後上季尾正值冒起，滿以為能夠強勢完成馬季，卻因受傷，又要提早抖暑，更損失了至少6場頭馬。問到新季目標時，希威森認為喺香港發展，必須不斷努力及不放棄任何機會，他亦希望新馬季可以遠離傷患，同時渴望可如於大前季般取得50場勝仗。 希威森