文家良3隻錶發光 07/09/2025 雖然文廐「自強不息」今日喺韓國首爾馬場角逐1200米沙地G3韓國短途錦標，但文家良並無飛往當地領軍，反而決定留守香港，擺明非常重視開鑼戰。咁原因都唔難理解嘅，話晒鎮倉寶「金鑽貴人」出戰特首盃，加埋文廐今日派13駒上陣冠絕同儕，決心要攞頭彩，難怪要喺香港領軍。 除咗「金鑽貴人」，今日文廐仲有3匹「錶」系賽駒「錶之極光」、「錶之多多」同埋「錶之星河」分途出擊，戰意肯定唔使懷疑。其實依家計埋未命名嘅L100同埋L104，共有6匹「錶」系賽駒交畀文家良訓練，而喺上月尾文廐拜神，「錶」系話事人楊建文亦有到場，仲話對練者百分百信任，將會有唔少質新馬交畀文家良訓練，為報答馬主嘅支持，幫「錶」系賽駒喺開鑼日攞威絕對係重要任務。 睇牌面，除咗尾場「錶之星河」，第6場嘅「錶之極光」亦不能忽視，「錶之極光」上季尾加盟文廐跑1000米直路賽得第5名，表現不差，暑假復課後進度更好，今次復出跑田草1200米，有權打開勝門。