梁家俊500W奪寶 10/09/2025 梁家俊上季尾手風極順，只係差啲啲影相輸畀潘明輝，先至失落「告東尼獎」。到咗今季佢都可以延續強勢，先喺騎師競跑同奧爾民夾檔拎第1名先聲奪人，然後又憑「讓愛高飛」攞到今季第1W，如果唔係因為超磅騎唔到「但求開心」，開鑼日已經成功起孖。 梁家俊 而喺今晚跑馬地賽事，騎5駒上陣嘅梁家俊梗係想維持強勢，咁啱原來佢喺香港已累積497場頭馬，只差3W就贏夠500場，單計佢今晚嘅陣容，有機會完成任務都唔奇。好似第1場五班1200米嘅「木火龍駒」，由目前榜首練馬師鄭俊偉訓練，上季尾正正喺梁家俊胯下一放到底贏同程，今次可以照辦煮碗；而第3場嘅「胡椒軍曹」上季谷戰開鑼戰，評55分贏四班谷草1000米，今回只評50分跑番同程，埋門試泥閘走勢吸引，千祈唔好因為隻馬已經8歲而睇小。至於守尾門嘅「至尊瑰寶」，上季煞科戰贏最後一場，就知呢匹羅廐馬跑谷草1200米嘅威力，所以有呢批馬喺手，梁家俊中三元贏夠500W，絕對唔出奇啦！ 羅富全 # 「至尊瑰寶」（箭嘴示）上季谷草煞科尾胡。