駿馬之曲堅係勁 14/09/2025 如果呢一刻問冠軍騎師潘頓邊隻馬最犀利同埋最重視，答案一定係馬王「嘉應高昇」，話晒係目前全球評分最高嘅短途馬，兼且已經連贏13仗，下個月更遠征澳洲挑戰珠穆朗瑪峰錦標，絕對係全城期待。不過，除咗「嘉應高昇」，喺上季尾嘅冠軍人馬頒獎典禮，潘頓就爆料除咗「嘉應高昇」外，仲睇好兩匹質新馬，一匹係仲未上陣嘅「包裝戰將」，另一匹就係蘇偉賢馬房嘅「駿馬之曲」，「駿馬之曲」今日復出升上三班再跑1000米直路賽，既然有冠軍騎師點名睇好，應可再下一城啦！ 潘頓 其實「駿馬之曲」上季初出時已經由潘頓3度試大閘考驗，重視之情可見一斑，而喺初出嗰日亦發生一宗小插曲，就係當馬兒行出跑道準備去起步點時，原本甩咗蹄鐵，但潘頓竟然發現兼且親自執番，結果去到閘前重新釘甲，最終順利一出即勝贏兩馬位。賽後被評磅員加9分至61分，最初以為呢個評分潘頓應該造唔到磅，但早前試閘仍由潘頓考驗，結果啱啱禮拜一報名表公布，「駿馬之曲」配120磅，潘頓自然可以效力，今仗就能證明馬兒係咪如佢所料可扶搖直上。 駿馬之曲上季一出即勝大把在手。