紅衣醒目一畀即衝 21/09/2025 羅富全馬房早前曾搬新倉，今季已憑「美神來」開胡，睇嚟人馬都適應，唔使好似上季咁要等到10月先開齋。相隔一星期，羅廐攻勢繼續加強，今期派遣7駒上陣，唔少質新子彈已經展現過潛力。 艾兆禮 羅廐7駒正選中，兩匹「紅衣」系賽駒當然具睇頭，而兩駒亦已交由艾兆禮執韁。當中列陣第7場四班1400米草地嘅「紅衣醒目」，上季尾最後一仗出戰田草一哩並改由艾兆禮接手，結果跑入亞軍，只敗於「彭玥」蹄下。 「紅衣醒目」9月9日試泥閘大勝而回。 艾兆禮都話「紅衣醒目」上場飲恨落敗唔抵，但佢覺得呢匹係前景唔錯嘅賽駒，最近騎過「紅衣醒目」試閘同快跳，感覺佢現時體能比上季有所提升，進度良好。 「紅衣醒目」喺9月9日試泥閘大勝4馬位而回，姿態引人，艾兆禮都提到呢課閘明顯感覺馬匹有進步，當自己對「紅衣醒目」稍作提示，佢已經交出唔錯反應，而此駒季初有新鮮感，跑1400米係一個好嘅起步點，但今場抽14檔起步的確係隱憂，不過如果克服到劣檔嘅話，應會在前列而返。