生日遇上樺加沙 董明朗被吹醒！ 28/09/2025 踏入開倉第3季，巫偉傑依家都算順風順水，今季初勢頭亦好，暫時已有4W兼保持沙田全勝，嚟到今日沙田賽事，咁啱係佢48歲牛一，Cody梗係想保持沙田例贏嘅勢頭，用頭馬作為生日禮物，其中「快馬加鞭」及「但求開心」都係牌面馬。不過除咗Cody，董明朗啱啱喺禮拜三度過非常難忘嘅32歲壽辰，事關原本嗰日係跑馬地夜賽，最終卻因超強颱風「樺加沙」襲港，搞到佢要喺10號風球下過生日。 「醒目先駒」（箭嘴示）上仗因走位失誤只得第2名。 颱風已經過去，對董明朗嚟講，若果想補祝生日，最好嘅禮物就梗係贏馬開齋，事關佢今季一直支持唔多，難得今日除咗喺季內首場三級賽慶典盃，再次為上季贏G3嘅「合夥奔馳」效力外。另有4匹坐騎，其中出戰第10場三班1400米草地嘅「醒目先駒」，更有機會幫佢開齋兼補祝生日。 董明朗 4歲新西蘭PPG「醒目先駒」上季出道至今跑咗8場，悉數由董明朗執韁，拎到1冠2亞1季，成績理想，今季復出跑四班1400米，可惜直路攞位唔順追唔切跑第2名。難得呢匹賢廐馬輸完唔換人，今次升上三班無疑對手更強，但由134磅變119磅，足足孭少咗15磅，肯定有幫助，有望收復前失。