梁家俊強勢衝500W 幸運多彩穩守尾門 01/10/2025 受到超強颱風「樺加沙」影響，文家良同埋梁家俊上星期提早飛去日本，為遠征日本短途馬錦標嘅「金鑽貴人」打點，可惜即使騎練都做足本分，但馬兒陣上走勢欠佳，中途被夾一夾失位，最終只能取得第11名，即使幕後有少少失望，但騎練同埋馬主都話今次係難得嘅經驗，始終要讓香港賽駒遠征海外，從來唔容易。 梁家俊 不過，即使「金鑽貴人」征日無功而還，但文家良同埋梁家俊亦有機會今日喺香港攜手再贏馬，主角就係第10場三班1400米嘅「幸運多彩」喇。呢匹4歲新西蘭PPG自從上季5月尾改用梁家俊執韁後，連續贏咗兩場四班田草1200米，兩次都係交出凌厲後勁掄元，最後一仗更孭135磅建功，對一匹當時只係3歲嘅賽駒，絕對克服極高難度。無疑今次升上三班兼增程初跑1400米，單計腳法，跑長200米問題不大，隨時更合發揮，況且質新馬孭少11磅，同梁家俊亦合拍，有望保持人馬合作全勝紀錄。 「幸運多彩」上季配梁家俊兩次全勝。 另外，梁家俊在港已累積499W，但佢今日未必要等到尾場先達500W大關，事關佢喺第3場再為贏出今季首W嘅「讓愛高飛」效力，第6場就有初出即入Q嘅「凱旋王者」，均要重視。