祥勝力駒有晒動靜 06/10/2025 韋達前日贏完「龍城強將」，取得季內沙田首勝，昨朝見佢心情靚靚，成個人sharp醒晒，周三晚賽事有6匹正選馬報名上陣，當然想乘勝追擊，其中對於報咗四班1200米第1組的「祥勝力駒」更有特別動靜，值得大家留意。 「祥勝力駒」昨朝快試十分勇猛。 韋廐6匹報名馬只有「祥勝力駒」昨朝到大圈快跳一段，其餘都係往內圈踱步做慢工夫，而練者督操睇馬，本應慣常走上停車場看台駐紮，但今次竟出乎意料之外，行上烽火台頂樓舉鏡，搏殺意欲極度濃厚。 「祥勝力駒」賽績確係唔錯，同程曾豪奪3W，剛戰亦拚入一席殿軍，跑完一仗更加上力，相信要爭取第4W絕非難事。