康昌之星火力全開 08/10/2025 除咗希斯、沈集成同埋今季銳意爭冠軍嘅方嘉柏，呢幾位急先鋒喺季初拎到好成績外，踏入來港開倉第3季嘅廖康銘喺呢個幾月嘅攻勢非常凌厲，除咗頭兩個賽日無進帳，最近6個賽日全部有馬贏，合共拎咗9W排喺首位，啱啱禮拜六更喺一場二班泥地1650米賽事包辦馬房三重彩，佢都話係自己從練以來首次，就知近期廖廐有幾旺。 康昌之星埋門試閘後上有板有眼。 馬圈永遠都係跟紅頂白，既然呢輪手風咁順，真係唔好畀佢停，以往廖康銘喺跑馬地成績更好，今晚回師谷草，梗係想連贏7日啦，而喺7匹參戰馬中，潘頓策騎嘅「渡月橋」固然多人吼實，但第4場由霍宏聲執韁嘅「康昌之星」，一樣有機會幫馬房完成任務。 廖康銘 「康昌之星」呢匹4歲新西蘭PPG，原來係廐侶「超勁火力」嘅同父同母嘅細佬，由廖康銘喺新西蘭2歲馬拍賣會用咗15萬紐元引入，擺明對馬匹質素有信心，而呢隻馬似乎同哥哥「超勁火力」性能有啲分別，後駒跑開短途，「康昌之星」反而增程跑一哩後表現更好，上季尾喺谷草1650米只係輸畀「奔妙星」入Q。今季「康昌之星」轉4歲更加成熟，賽前刻意試咗3課大閘先上陣，配上霍宏聲排3檔好位，機會樂觀。 霍宏聲