潘頓蔡約翰今季首合作 真心傳奇可上頂班 12/10/2025 蔡約翰同埋潘頓呢對冠軍騎練組合，上季攜手贏咗15場頭馬，但今季過咗個幾月，佢哋竟然連一次合作都未有，今日佢哋終於攜手出擊，就係第9場二班1200米草地嘅「真心傳奇」，呢匹4歲馬上季4W都係由潘頓執韁，人馬非常合拍，難怪今次復出繼續用呢位冠軍騎師。 潘頓 聽馬主陳家揚講，原來佢同太太及囝囝一家三口都識騎馬，所以想擁有一匹自己嘅馬，而透過一個佢自己研發嘅馬匹甄選系統，就喺達德素拍賣會搵到「真心傳奇」返嚟，同埋好開心能夠交畀蔡約翰訓練。陳生仲話記得「真心傳奇」初出嗰場，佢同蔡約翰講愛駒唔跑包尾就得，點知幾乎喺谷草1200米一出即勝，只係輸頭位飲恨，最終上季10戰得4冠2亞2季，佢都有啲意料之外。 蔡約翰 另外，陳家揚仲話自從做咗馬主，同家人多咗話題，又可以同佢哋分享贏馬喜悅，展望今季「真心傳奇」可以贏上一班，甚至可以跑更高級嘅賽事，所以今次復出跑二班1200米，睇吓能否延續上季嘅佳績？ 「真心傳奇」上季4勝全由潘頓一手包辦。