方嘉柏揸住3粒星 12/10/2025 今季銳意爭冠，更一度打算請莫雷拉做馬房主帥嘅方嘉柏，自從喺上個月21日贏咗匹「信心星」後，對上4次賽事都無進帳，成績唔算太突出，啱啱禮拜三重返谷草主場亦只得2亞1季。嚟到今日沙田賽事，柏廐派8駒上陣，包括3匹「心星」系賽駒「賢心星」、「信心星」同埋「仁心星」，有望幫方仔打開缺口。 方嘉柏 第1場五班200米草地嘅「賢心星」，5歲PPG今季已經跑咗兩場，先喺四班谷草1200米得第5名，然後轉爭田草同程得季軍，負於「錶之極光」兩個幾馬位，結果兩場賽事有獎金收之餘，竟然可以減多2分，今場可以落到五班出擊，而此駒上季初落到五班立即贏馬開齋，證明喺五班明顯超卓，今次用徒弟黃智弘唔使孭重磅，仲要抽4檔好位，真係條件夠晒。 「賢心星」上仗得季軍竟獲減分降班。 至於守尾門嘅「仁心星」雖然係季內首戰，但方仔安排此駒喺從化試咗兩課大閘先上陣，擺明唔好唔跑，仲要除埋戴咗兩次都輸晒嘅開縫眼罩，有望交出好成績。