熾烈神駒有余未盡 12/10/2025 「神駒」系嘅余伯余潤興絕對係香港馬圈其中一位最資深嘅馬主，佢兩個仔余國賢、余國樑依家都係馬主，估唔到依家就連余伯嘅孫余嘉權一樣有養馬，上個月中余生名下嘅「熾烈神駒」轉跑泥地1200米立即建功，今次升上三班再跑同程，擺明都係想再下一城。 馬主余嘉權 聽余嘉權講，「熾烈神駒」係佢首匹個人名下嘅馬，而佢自己家族一向都熱愛賽馬，上個月好多家族團體成員都有到場為愛駒打氣，最終一齊拉頭馬。佢仲提到上仗愛駒初跑泥地，自己都好緊張，而沈集成匯報愛駒泥閘試得好，快跳表現又唔差，相信可以應付泥地，結果跟隨成哥意見轉場出擊，最終取得美滿成果。 「熾烈神駒」上仗初跑泥地即勝。 雖然「熾烈神駒」由四班升上三班，但既然搵到泥地新出路，今次當然再攻同程，仲要孭少16磅，即使潘頓造唔到磅而騎咗「勁先生」，但改用喺英國做過全天候賽冠軍騎師嘅金誠剛執韁，影響未必太大，有權再下一城。