何澤堯報答威哥　勁速威龍搏到盡 15/10/2025 前華將一哥何澤堯今季總算擺脫傷患困擾，可以健健康康上陣，而佢先有一個好開始，開鑼日立即憑「星運少爵」開齋，可惜之後成績唔算太突出，去到上周三再靠「紅海勁」拎到今季第2W。嚟到今晚跑馬地賽事，何澤堯共有7匹坐騎，其中4駒嚟自呂健威馬房，其實今季呢對華人騎練組合已經11次攜手出擊，可惜仲未贏馬，最叻只係得「勁進駒」輸啲啲飲恨，而後駒上周三改用潘頓補中。 何澤堯 不過，呂健威一向都支持何澤堯，為報答威哥信任，相信何澤堯應該都好想盡快幫練者建功，今次4匹坐騎中，最值得留意應該係第7場二班1800米嘅「勁速威龍」。呢匹6歲新西蘭自購馬當初購入都係想跑4歲馬經典系列賽，可惜無功而還，去到上年5月因為右骨盆受傷，抖咗一段時間，去到今年初首次跑谷草1800米順利建功，翌仗升上二班轉跑田草1600米只輸畀「玩笑」，證明喺二班夠爭，可惜之後卻因左前腿韌帶受傷抖到依家。不過，從此駒埋門試泥閘可以跑贏「愛馬善」所見，健康問題已不大，咁啱何澤堯同呂健威對上一匹合作頭馬，就係「勁速威龍」，睇吓今次能否為呢對騎練帶來突破啦！ 呂健威 # 「勁速威龍」年初谷草1800米一擊即中。