黃智弘幸運福星慶生 19/10/2025 雖然今季只係得5磅減，但見習生黃智弘嘅成績卻相當唔錯，話咁快已經有6場頭馬，其中5W嚟自師傅方嘉柏，睇嚟作為徒弟，佢都完全受惠於師傅全力爭冠。咁啱尋日就係黃智弘25歲牛一，相信佢都好想喺今日沙田賽事繼續有進帳，既可以幫自己連贏3日，順便補祝生日嘛，而喺佢6匹坐騎中，不妨留意第1場五班1400米嘅「幸運福星」，隨時成為佢嘅賀壽馬。 黃智弘 4歲澳洲PPG「幸運福星」，上季似乎未太適應水土，8戰全負並由52分減至38分，但今季去咗巫偉傑馬房後，落到五班上陣有進展，季初喺五班谷草1200米跑第5名，然後轉場跑田草1200米得殿軍，表現唔算太差。無疑此駒今季兩場都係放頭，入到直路開始力弱，今次增程跑1400米可能更吃虧，但其實此駒上季中喺1400米曾得第4名，只係落後「神馳」兩個半馬位，卻可以跑贏「風繼續吹」同埋「勁沙塵」，依家喺五班出賽，應該有啲着數，況且改用黃智弘孭少5磅只負125磅，話唔定可以變身，為黃智弘送嚟一份生日禮物。 「幸運福星」季內兩戰循序漸進。