嘉應高昇勇奪珠峰獎金破億 19/10/2025 全球期待嘅1200米一級賽珠穆朗瑪峰錦標，香港馬王、全球最高評分短途馬「嘉應高昇」不負眾望，擊敗一眾澳洲最強短途好手，以大熱門身份贏馬，為港爭光，亦係首度有香港賽駒勝出呢項全球最高獎金草地賽事。今仗代表香港賽馬會出戰嘅「嘉應高昇」，取得約3,584萬港元頭馬獎金，令到競賽生涯總獎金破億，達到1.03億港元，同時亦係佢第5次一級賽勝利兼14連勝，令全球認識到佢嘅超凡短途實力，昨日蘭域馬場有超過5萬人進場觀賽，達至馬場可容納的上限。 「嘉應高昇」順利勝出珠穆朗瑪峰錦標。 香港馬王「嘉應高昇」成功征服珠穆朗瑪峰錦標，希斯表示從練生涯訓練過唔少好馬，當中日本盃盟主「請放鬆」係其中一匹練過嘅好馬，而「嘉應高昇」同等咁出色及重要，毋庸置疑係世界級短途好手。問到「嘉應高昇」下年會否到澳洲衞冕珠峰錦標，希斯反問：「Why Not？」希斯隨後表示，「嘉應高昇」喺澳洲第1次試閘有啲唔太適應，經過今年之後，相信明年再到澳洲會更好。 希斯、潘頓 潘頓：從騎最滿意頭馬 至於「嘉應高昇」成功征服珠穆朗瑪峰錦標，其中一個功臣當然係鞍上人潘頓。潘頓賽後難掩興奮，考慮到今場賽事嘅重要性，所以會形容「嘉應高昇」今場勝利係佢最滿意嘅頭馬，而佢從未懷疑「嘉應高昇」嘅實力，係絕對Superstar，昨日喺蘭域馬場面對咁多群眾，「嘉應高昇」都適應得都好好，以1分8秒13贏馬真係非常出色。 「嘉應高昇」勝出全球最高獎金草地賽事珠穆朗瑪峰錦標，奪得約3,584萬港元頭馬獎金固然厲害，同時亦帶挈澳洲一名賭客大發橫財。 幸運兒16串1贏360萬 該名澳洲賭客買咗一條包含不同體育項目嘅16串1過關，包括「精緻之道」勝出雲絲仙子錦標、英超利物浦喺對住般尼茅夫嘅賽事當中，喺法定時間85分鐘之後勝出賽事，而熱刺及曼城同時勝出、奧蘇利雲與羅拔臣同時勝出桌球賽事，以及其他欖球、棒球、高爾夫球、網球項目，結果頭15關全中，尾關就係「嘉應高昇」贏珠峰錦標，令呢位賭客贏走71.1萬澳元（約360萬港元）彩金。