久久為攻7歲無保留 22/10/2025 希斯憑「嘉應高昇」贏取了珠峰錦標載譽而歸，然而有得必有失，佢飛咗去澳洲十幾日備戰，香港賽事難免會顧此失彼，今期夜賽正式回防全力為賽駒打點，必定咬牙切齒追數。 「久久為攻」昨朝操練備戰。 昨晨希斯在烽火台舉鏡逐隻睇加課馬，又到機坪搵潘頓開會，可謂動靜多多，重點爭分棋子必定係擺尾3場，第7場「囍眼光」上仗直路困死，相隔一星期匆匆再戰兼換阿田主轡，要拚個明白。第8場「久久為攻」連仗接近，趁狀態喼住咁弗檔位亦佳，7歲馬無保留。 希威森在第9場魚與熊掌，「天星」改配潘頓搏殺證明幕後照樣戰意如虹，賽前一課試閘走勢吸引，排位朝已由騎者快跳仄準，初跑快活谷大家估估吓，話唔定有潘一哥加持會大變身。 黃寶妮11月2日起可戰谷草 另外，經過多次跑馬地試閘之後，黃寶妮終於獲馬會批准於谷草出賽，起始日期為11月2日星期日，當日係跑馬地日馬賽事，谷戰初登場毋須摸黑作賽，相信對黃寶妮有好大幫助。